عبد الله بن عبد العزيز العيفان (*) بين «بربر» وثكنة «بربر خازن» والفجر
زياد الرحباني
عيسى: لسوء الحظ أو لحسنو ما قادر إجزم، إنما في اشياء بيصير الإنسان ـ المواطن قادر يحصرها مع الوقت، خاصة إذا بتقعّدُو دولتو وجمعية حماية المستهلك ونقابة الفنانين والرقاصات والبَجَع! فترات قسرية بالبيت بحجة إنّو المستوى الفني العام متدهور كتير وهالنقابة أول مين عم بيعاني والأساتذة أنطوان كرباج وإحسان صادق هني أكتر تنين عم بيعانوا وعم يحاولوا يكافحوا الانحدار خلال النهار إنما الامكانات محدودة والدولة، نكاية فيهن يمكن، بتضل مقصّرة ومستلشقة، فـ... بيحاولوا بالنهار من خلال نقاباتهن الكتيرة اللي ما بتتوحّد يا شيخ وهني خوتانين طبعاً كمان من هالقصة وبعبّروا عن قرفهن بالليل بالبرامج التلفزيونية الهابطة كمان والمسرحيات اللي مدري ليش وحدها نافدة من هالهبوط بعكس حركة التاريخ!! .. ليس...
في اشياء اذن، متل ما ذكرنا، بيصير المواطن عالبطالة الموسمية والقعود، تنحصر معو الاشيا اللي بتحصل، ما بيروت صغيرة، وطبعاً أنا عم إحكي بالنهاية عن حالي وعن خبرتي بهالموضوع. صرت فيني أكدِلكُن مثلاً، شو هوي الوقت النموذجي لسرقة نوع من السيارات أو لزرع العبوات أو رمي القنابل، واللي هوّي تقريباً ذاتو، وهيدا شي ممتاز (المفروض) للجهات المتعددة خارج مؤسسة الجيش اللبناني، السهرانة عالأمن، أي بس لأيا ساعة؟! هون... والنوم طبعاً ودايماً سلطان، الوقت هوي يا إخواتي وعا مسؤوليتي، أو A: من التلاتة ونص وخمسة للأربعة إلا تلت، أو B: اربعة ونصف إلا خمسة للأربعة ونص وخمسة، خمسة إلا تلت مكسيموم لأنو بعد هيك ممكن يتعرض الجاني او المخطط لأي جناية من اللي ذكرناهن، لكبسات أو مفاجآت من قبل عمال توزيع الصحف اللي بيتجمعوا قبل الانطلاق حد ليبانون تاكسي ومعتوق للمعجنات حد مبنى جريدة "النهار" القديم، ليه هالوقت؟ بسيطة كتير لأنو هيدا الوقت بيسقط قبل أذان الفجر مع كل التغييرات الفصلية بتوقيتو واللي بتتلاعب بين: الساعة 3،50 (أربعة إلا عشرة) والـ4,15 (أربعة وربع) وبعد فلول آخر دوريات قوى «القمح الداخلي» الراجعين تلفانين من هالمواطنين الفاسدين والكذابين ومرقوا ينسوا تعبهن عند «بربر» بالفرعين: حمرا وسبيرز، قبل ما يسرّبوا على ثكنة «بربر خازن» بمنطقة معروفة بس سرية تابعة بشكل أو بآخر لشارع فردان. إي والله!
بتعرفوا مثلاً ؟ شو الوقت النموذجي لتفوت فيك، دورية صباحية مبكرة لشرطة سير بيروت إنت وصافف سيارتك تحت بيتك ونايم ربما او هيك بتتمنى ويطلع العنصر (معاون أو معاون أول) اللي كان هوي سايق الجيب الإسباني الحديث وتفتحلو ليقلّك: صباح الخير، فتنا فيك استاذ، بتحب تنزل معنا تشوف الضربة؟! وشو الوقت النموذجي مثلاً من بعد ما تلبس تيابك دَرْكبة وتنزل معو، ليطلب منك ظابط الدورية انو: «بلكي استاذ منطلبلك العميد نبيل مرعي، قائد شرطة بيروت، وبتقللو انو انتِ معقول تسقط حقك عن العنصر يللي كان سايق وفات فيك، لأن إذا ما عملنا هالاتصال معقول يحبسوه جمعة لعشرة أيام، وحضرتك بتعرف إنو ما بتطلع إلا براس المعتّر!! فخلينا نطلبلك العميد وهاي المعاون ما رح ينسالك إياها (وفيك تكفي: وبوعدك إنو من هالصبحية وبالرايح - يعني نسينا نقللكن يا اخواتي وقت الصبحية النموذجي : الساعة سبعة وخمسة عابكرا- إي فـ: «من هالصبحية وبالرايح بيوعدك المعاون انو كيف ما كبس أو شفط أو كوّع ومهما كانت المهمة اللي ضاهر فيها، ما بقا ممكن يفوت فيك ولا مرة، صدقني! هاي غلطة، أنا عم بعترفلك، إمضيلي هون بس. المحضر مضطرين نعمل محضر لأنو»).!!
هلّق، متل ما في اوقات كتير محددة بتصير تبيّن وتنحصر مع الوقت، في مناطق ضمن بيروت بتنطبق عليها نفس المواصفات، منطقة راس بيروت على سبيل المثال، شو بدك! لذة راس بيروت، إنو بكل مراحل الحرب، من الخطف عالهوية للاجتياح بالـ82 لحرب الجبل لمعارك «أمل» والاشتراكية ـ لحرب التحرير لحرب الإلغاء لوصول الحريري لاتفاق نيسان بالـ96 للتحرير بالـ2000 لـ11 أيلول ومبنى التجارة العالمي تصوّر، لحرب العراق الثانية بالـ2003 لاستشهاد رفيق الحريري لانسحاب القوات السورية هيّي ومؤتمر الطائف لعدوان تموز لاعتصام المعارضة من 2007 لـ7 أيار السنة الماضية، ظلّت منطقة راس بيروت سبحان الله، منطقة نموذجيّة للعيش المشترك، لوجّ لبنان الحقيقي اللي كل السواح والاجانب بيقصدوه بس يفكروا يجوا عا بيروت، وهالشي مردّو إنو شو في ملّة معقول تخطر عا راسك كلها بتلاقيها موجودة براس بيروت.
مخايل: إي مظبوط يعني إنو مش سُنَّة عالحَّل.
عيسى: اي طبعا، ما شو بيجيب الكويتية والسعودية لكن؟.
■ ■ ■
2 «عيوني هالعيون»!؟
عيسى: كان مبارح، النايب المظفر الاستاذ هادي حبيش مستقبلينو عالتلفزيون بالنهار عا بكرا يا خالو... (يتبع).
(*) يتبع أيضاً ـ يتبع هادي حبيش أو العكس صحيح.
عدد الاربعاء ١ تموز ٢٠٠٩
قرأت مقالة زياد عن "البربرين" ثم سمعت قصة صبية تعرضت لسوء تفاهم مع قوى الأمن نصحها والدها على إثره بأن تلملم المسألة لأنه لا يستطيع ضمان أمنهااو سلامة سيارتها في ما لو اصرت على تقديم شكوى على رجل"الأمن"الشهم الذي حاول ابتزازها بحيث تدفع له مبلغا من المال مقابل عدم حجز السيارة. واود ان اروي تجربتي الاحد الماضي, حيث قامت دورية في احدى السيارات السوداء الجديدة بخبط سيارتي المتوقفة تماما, وادعى رئيس الدورية بكل عنفوان ورغم وجود الشهود واعتراف السائق ووضوح الضرر ان السيارة كانت متضررة سابقا . وقد نصحني الاجاويد ومن بينهم خبير السير بان الملم الموضوع بدوري واتحمل "الضربة" لأنه ليس ثمة طائل من متابعته. ولم يتوان جميع رجال الدورية عن التأكيد لي بأنهم جميعا "تحت القانون"!!! ضربة السيارة, سأتحملها ولكن الضربة الكبرى حين يصير حاميها بلطجيا يتحكم فيها (البلد) فهذه من يتحملها؟! سؤال برسم وزير الداخلية الذي احترم واقدر.
والله عال يا زياد إذا بتعرف الموعد الامثل للسرقات ولوضع العبوات ليش ما تستعين فيك قوى الأمن الداخلي لتستفيد من خبراتك وعقبال ماتنحل مشكلة العملاق انطوان كرباج وعقدتنا نحنا اللي منحبك وساكنين بالشام ونشوفك 365 يوم على365 يوم عم تعمل حفلات عنا بالشام ويا ريت تزيد عدد الحفلات لانو بالنسبة لإلي انا بموت فيك من شي تلات سنين وإلى أبد الأبدين
بالقرب من ثكنة بربر الخازن، في 3 شباب كل واحد من تيار شكل..شي تقدمي اشتراكي ( بالموتير لانو مش عم تجي الكهربا سمالله ) وشي امل ( يلي ما بقى في منو شي ) وشي مستقبل ( المجهول ) ..اذا بقلكن انو ما حدن بالو بيلي صار بعايشة بكار وعايشة اكوت موا ..ولا حدن بالو ب 7 ايار و"اجتياح بيروت"، ولا حدن هامو شي..كل همن هالشباب هوي هيدا الصاروخ اللي بأمنلن ياه احدهن من حي السلم..ايه والله و وحياة ستي مش عم امزح
ليش بعد في اتنين الاول اسمه عيسى والتاني اسمه مخايل بيحكوا مع بعض إلا إذا كانوا براس بيروت أو إلا إذا كانوا اتنياتون يا من 8 او 14
ما بعرف شوف خص الكويتية والسعودية بالموضوع , يمكن انا اكون مش فاهم , بس اللي بعرفوا ان حافظ ريبتوار الأخوين رحباني وكل شغل زياد , عن ظهر قلب ! , يعني منيح باللغة اللبنانية ( على رأي سعيد عقل ) , بس , ما فهمت , شو خص , الكويتية واللبنانية !!
في حدا يفهمنا يا عمي , اللي بفهموا شي واحد , كل ما واحد طلع عبوالو يغني موال , بينزل سب بالخليج , وبالخليجية , وهن سبب التخلف , والضياع والتشرذم , والسافاج (مش السافاك ..!) وشو ما صار , الحق علخليجية , انا بس الي راي , ابل 1960 , ابل ما يرتفع سعر البترول ويطلعلنا المال المش نظيف , هل كان العرب (ان سلمنا انن عرب مش فينيقية او فراعنة) احسن حالا يا ترى ؟
انشر يا ناشر...
برود: عيسى..بتعرف مينو مارسيل خليفة؟
-إي بعرف...هيدا بيشتغل دليل سياحي بمغارة جعيتا..بيكون ابن عمو لانطوان كرباج.
-مين كرباج؟
-هيد الكرباج اللي بيطلع الساعة 5 ونص عبكرة الصبح على راصوا لزياد..زياد ارابتك من المتن! زياد ولــوو!
يعني هي القصة عويصة شوي و لازم بقى تنحل، لأنو بلاد الغربة ضاقت فينا و ما فينا نرجع عا لبنان لأنو الدركي الفلتان و يلي بسوق بعكس السير و بيركب عل الموبيليت بلا نمرة و بلطش النسوان عل الرايح و الجاي مفكر حالو جغل الحي، هو نموذج عن الطبقة المعفنة و الفلتانة كمان و دايمن بدا مين يضبا يا من الرياض او من الشام، و لك بتعرف شو الحق مش عليون الحق عل الي لطخو اديون بحبر انتخابات مسخرة ، و رح يلطخو اديهن بشرف و بدم و بلقمة خبز و بحرقة قلب مغترب انشحط من شغلو و ما قادر يرجع لانو ما في بلد يضبو، بلد الميليشيات و حكام الطوايف!
انا مغتربة متلك واحساسي بيشبه احساسك: ألم..قرف وحرقة غربة! بيسألوني: انت مع مين؟ 8 او 14 آذار؟ وشو قولك لازم قلهم؟ أصلا انا مش شايفة قدامي الا الشلة ذاتها(استثني كم واحد بينعدوا على اصابع ايد واحدة,يعني ما في داعي للإدتين)وما شاء الله عنهم كل مدة ومدة بغيروا عناوينهم ومبادئهم وحلفاءهم واعداءهم!!!والشعب المسكين _ما بعرف اذا مسكين فعلا_ ما حلوا يتعلم ويوعا!شعبنا كله ناقصه جلسات تحليل نفسي لانو بضل مضيع هويته..الظاهر عنده حالة انفصام او في ابسط الاحوال عدم نضوج وطني!!!!
أنا يا خيي مع اللي بيوعدني وبيوفي بوعده بلبنان جديد غير كل اللي مضى, لبنان النظام, لبنان الكهربا والماي , لبنان ومتطلبات العيش الاساسية, لبنان شوية نظافة وترتيب, لبنان شوية عيش كريم ...و اذا كان اللي بيوفي بوعده من 8 او 14 او غيره ما بهم...بهمني لبنان جديد ممكن نحلم نرجعله ونعيش فيه...معقولة؟؟؟!!!!
والله فاجأتوني ليش لسه مخايل وعيسى بيحكوا مع بعض مع على أساس البلد مقسوم وشي 8 وشي 14؟؟؟؟؟؟؟؟
هلق شو بدنا ...
صحيح الحالة تعبانة يا ليلى
و
قهوة نخل التنين الها زماااان ما عملت اختبار أصوات
بس..
نحن جيل محظوظ
لأن سمعنا حبيبتنا فيروز
ومنيح اني اجيت على الدنيا بعد ما غنت السيدة فيروز (مو قبل)
ومحظوظة اني سمعت أجمل الاغاني من الأخوين رحباني (لروحهم السلام ولأسماؤن الخلود)
وهلق معك حبيبنا زياد
انا محظوظة اني سمعتك
وبتممنى كون محظوظة لشوفك بالشام
و
مشتاقةشوفك
مشتاقة شووووووووووفك
ومن دون لكن...
بس بدي قول للسيد المدعي بـأنه الحقيقة بأن سورية بالغنى عن لبنان كمحافظة تابعة لهاسوريا كانت حريصة دوما على استقرار لبنان على الأقل نحن آخر شيء ممكن أن نسأل عنه هو الطائفة في وقت هاد أول شي انتو بتسالو عنو للاسف أنا مالي بهالحكي انا لازلت مؤمنة بوجود حس عالي لدى معظم اللبنانين الأبطال بوطنيتون أما فيما يخص العظيم زياد بدي قلك انو إذا زياد غير رأيو فيما كان يحكي عن سوريا- في حال سلمنا بأنو الكلام مؤذي - فاهاد كرمال الحب الصادق الي شافو ولمسو بكل شي بالشام بطلابا بكبارا الي كانو ناطرين هاللقاء من زمان وحسدونا نحنا الشباب الي شفنا الرائع زياد بهالعمر زياد عن جد كان متفاجئ بالحب الي بيكنلو ياه الشعب السوري وصدقوني إنو هاد مو رأيي أنا بس هاد رأي آلاف مؤلفة متلي تؤمن حقاً بزياد
انو وبما انو نحنا سوررين وزياد لبناني وهيك ما بيحقلنا نحب زياد
يا اخي لكن ضبوه بشي محل وخبوه عنا ما لعنتو نفسو للزلمة ولك كان يغني بالمطاعم ويقلن بلشوا عشا شو بدك اكتر من هيك عمل عملوه بزياد
زياد حبيباتي اللبنينية اللي شايفينو ماركة مسجلة باسمهن ما عاد حصري صار عابر للحدود والنا حق فيه متلنا متلكم
شكرا الك صديقتي بس هنن تعودوا انو السوري ما بيحب اللبناني
لك فيقوا بقا وحاجة نوم
الحقيقة المحزنة انكم غير مقتنعين بلبنان ومصريين على اننا نحن اللبنانيون محافظة من سوريا وانكم تتلطون وراء الوطنية والعروبة وتتفاخرون بالمثال السوري المحافظ على السلام في بلده وحماية السلم على الحدود السورية الفلسطنية (المحتلة)، ياعمي نحن مصريين على الجنون اللبناني ونفتخر فيه ولن نرضى بالتعقل السوري او المصري الراضي برئيس جمهوري لمدة 30 سنة مع وجود امن نحن متهوريين لكن محبين للحرية والديمقراطية (غير التوافقية) وسنبقى لبنانيين رغم انف كل الفلاسفة ورغم انف الذين ينتقدون السوريين في مسرحياتهم واليوم باعو مبادئهم لقاء حفلة في الشام ......